ISANG matinding pagsubok ang haharapin ni Nilo (Ejay Falcon) at Bonifacia (Lorna Tolentino) sa isang kuwento ng pagmamahalang hindi madaling tanggapin ng lipunan sa Maalaala Mo Kaya ngayong Sabado ng gabi, hosted by Charo Santos.
Sa murang edad na 10 taon, mamumulat na si Nilo sa tunay na pag-ibig dahil sa magandang pagpapalaki ng mga magulang. Sa sariling pamilya lamang iikot ang buhay nito hanggang sa makilala si Bonifacia, isang babaeng 32 taon ang tanda sa kanya.
Ang pagkagusto ni Nilo ay magiging pag-ibig sa kalaunan. At dahil nga sa pagitan ng edad, hindi ito madaling matatagap ng kani-kanilang pamilya. Ngunit magiging masugid si Nilo, gagawin ang kahat para lamang mapalapit sa iniirog.
Nang maging byuda si Bonifacia, tuluyan nang maglalakas loob ang binata na suyuin ang babaeng buong buhay niyang tinuring “princess.”
Dahil sa panunuyong ito, mapapalapit din ang loob ni Bonifacia sa binata at magkakarelasyon ang dalawa.
Ililihim ng dalawa ito sa mga pamilya at magpapakalayo. Mapapadpad sila sa Puerto Galera kung saan kahit walang nakakakilala, hinahamak pa rin ang kanilang pagsasama dahil sa diperensya sa edad na ikasasama ng loob ni Bonifacia.
Matatanggap pa kaya ng pamilya nina Nilo at Bonifacia ang kanilang pag-iibigan? Totoo nga bang walang kinikilalang edad ang tunay na pag-ibig?
Kasama rin sa MMK episode na ito sina Zaijian Jaranilla, Marco Masa, Allan Paule, Bing Davao, Kokoy de Santos, Faye Alhambra, Manuel Chua at Lovely Rivero. Ito’y sa direksyon ni Frasco Mortiz at sa panulat nina Joan Habana at Arah Jell Badayos.
Panoorin ang longest-running drama anthology sa Asya, ang MMK, tuwing Sabado ng gabi sa ABS-CBN.