ARESTADO ang isang dating miyembro ng grupong Sexbomb at isang lalaki nang makuhaan ng aabot sa P70,000 halaga ng hinihinalang shabu sa buy-bust operation sa Bay, Laguna, Linggo ng gabi.
Nadakip si Sheena Joanna Uypico, 33, residente ng San Pablo City, at ang tricycle driver na si Elmer Senorises, sa paradahan ng isang fastfood outlet sa Brgy. Dila, sabi ni Senior Supt. Eleazar Matta, direktor ng Laguna provincial police.
Isinagawa ng mga tauhan ng Provincial Intelligence Branch at Drug Enforcement Unit ang operasyon pasado alas-8.
Nakabili ang isa sa mga operatiba ng isang sachet ng hinihinalang shabu mula sa mga suspek, ani Matta.
Nakuha kay Senorises ang P1,000 marked money, coin purse na may anim na maliit na envelope na may sachet ng hinihinalang shabu, P5,000 cash na hinihinalang pinagbentahan din ng droga, at isang kotse.
Nakumpiska naman kay Uypico ang isang coin purse na may limang envelope na may mga sachet din ng hinihinalang shabu, ani Matta.
Aabot sa 25 gramo o halagang P70,000 ang nakumpiskang umano’y iligal na droga sa mga suspek, aniya.
Hinahandaan na ng kasong paglabag sa Comprehensive Dangerous Drugs Law sina Uypico at Senorises.