MUKHANG nagtampo si Janno Gibbs sa hindi niya pagkakasama sa 2018 Christmas Station ID ng ABS-CBN.
Sa kanyang Instagram account, ni-repost ng singer-comedian ang kanyang litrato matapos pumirma ng kontrata sa Star Music, na may caption na, “Throwback to Sept 12 this year when I signed with @starmusicph. Naalala ko lang. Sila yata, di ako naalala.” Gumamit pa siya ng hashtags na kesyo “Huwag ninyo akong hanapin sa station ID at ASAP Nila ‘Yan.”
Sa lahat ng IG followers ni Janno na nagtatanong tungkol sa kanyang hinaing, iisa ang isinasagot niya, “Ayaw nila sa akin, e.”
Napansin din ng madlang pipol na bukod kay Janno, wala rin sa Christmas Station ID ng ABS-CBN ang iba pang malalaking bituin ng Kapamilya Network, tulad nina Judy Ann Santos, Sharon Cuneta at Julia Montes.