ISASALANG muna sa musical variety show ng Kapuso Network na Studio 7 ang sikat na Legaspi twins na sina Mavy at Cassy. Ipamamalas ng dalawa sa programa ang husay nila sa pasasayaw!
Todo-pasasalamat ang kambal sa mga magulang na sina Zoren Legaspi at Carmina Villaroel dahil pinayagan silang maging bahagi ng programa na mapapanood na simula sa Oct. 14.
Swak na swak ang programa sa kanila lalo na’t hilig nila talaga ang magsayaw kaya magaan lang ang gagawin nila sa show.
Ngayon lang muli nagkaroon ng musical variety show ang GMA after several years. Hindi naman ipinagkaila ng mga nasa likod ng Studio 7 na na-inspire sila sa tagumpay ng katatapos lang singing search na The Clash.
Kaya hayun, kasama rin sa line up ng magiging performers sa show ang Top 5 Clashers na sina Golden Canedo (The Clash Ultimate Champion), Jong Madaliday, Garrett Bolden, Josh Adornado at Miriam Manalo.
Makakasama rin sa Studio 7 sina Julie Anne San Jose, Mark Bautista, Christian Bautista, Rayver Cruz, Mikee Quintos, Gabbi Garcia, Kyline Alcantara, Migo Adecer, Kate Valdez at ang comic duo na sina Donita Nose at Tekla.