Sa takbo ng kuwento ng FPJ’s Ang Probinsyano ay tila nabibilang na ang araw ni Rowell Santiago sa karakter niya bilang si Oscar Hidalgo, ang Presidente ng Pilipinas.
Pinagpaplanuhan na kasi siyang patayin ni Edu Manzano, ang bise presidente niyang si Lucas Cabrera, dahil hindi nito pinagbigyan na mabigyan ng presidential pardon ang anak nitong hinatulan ng guilty na si Mark Anthony Fernandez bilang si Cong. Brandon Cabrera.
Sinabi ni Edu ang plano niyang patayin ang presidente sa kapwa niya takam na takam din sa posisyon na si John Arcilla bilang si Renato Hipolito na walang hawak na posisyon ngayon.
Pero iba ang plano naman ni John dahil una muna niyang papatayin si Edu kasunod si Rowell.
Nakakaramdam na kasi si Rowell na magkasabwat sina Edu at John kaya nagmamatigas na siya ngayon.
Sa kabilang banda ay planong dukutin ng mga Vendetta sa pangunguna ni Cardo Dalisay (Coco Martin) ang presidente para ipaalam kung sino ang tunay na kaaway ng lipunan.
Nakapasok na sa Malakanyang ang grupong Vendetta at ngayong Lunes malalaman kung tuluyang makikidnap si Rowell at anong mangyayari sa pamilya nitong maiiwan.
Samantala, nagkasundo-sundo na ang Vendetta at mga karakter nina John Prats at Marc Solis kaya masaya na ulit si Cardo at makakatulong pa nila sa kanilang mga pakay laban sa grupo nina Edu, John at Jhong Hilario bilang si Alakdan.
Hindi pa rin natitinag ang FPJ’s Ang Probinsyano pagdating sa ratings game dahil napapanatili pa rin nito ang 40% plus audience share.
Anyway, nagtanong kami sa ilang taga-ABS-CBN kung may plano bang kunin ni Coco ang dating sexy singer na si Mystica matapos itong ma-nawagan on national TV na sana’y kunin din siyang guest sa aksyon serye bilang tulong na rin sa kanyang kabuhayan pero ang sagot sa amin ay, “Wala pa pong balita.”