ISA si Jake Ejercito sa maraming Pinoy na na-bad trip sa panlalait at pambabastos ng Kuwaiti celebrity at social media influencer na si Sondos Alqattan sa mga OFW.
Nag-viral ang video ng Kuwaiti national kung saan mapapanood ang pagrereklamo nito sa ipinatupad na batas sa Kuwait kung saan binibigyan ang mga Filipino workers doon ng isang day-off (sa isang linggo) at ang karapatang itago ang kanilang passport.
Bukod dito, buong-ningning ding tinawag na alipin ni Sondos ang mga OFW partikular na ang mga kasambahay.
Hindi nakapagpigil ang anak ni Manila Mayor Joseph Estrada ang magalit kay Sondos at nag-tweet ng, “Perhaps @Sondos_q should eat her makeup, so she’d be decent on the inside too.”
Kilala rin kasi ang Kuwaiti celebrity sa kanyang make-up tutorial videos sa internet.
Kaliwa’t kanang batikos ang inabot ni Sondos sa mga Pinoy netizen, hinamon pa nila itong mag-issue ng public apology para sa mga nilait niyang OFW kasabay ng panawagan na i-boycott ang mga proyekto nito.
Sa kasalukuyan, nag-restrict na ng kanyang social media accounts ang Kuwaiti celebrity, hindi na nito siguro nakayanan ang pagresbak sa kanya ng mga galit na galit na Pinoy.