KYLIE PADILLA, ROBIN PADILLA AT ALJUR ABRENICA
ISANG malaking blessing daw para kay Aljur Abrenica ang makaayos sila ni Robin Padilla, ang tatay ng kanyang partner na si Kylie Padilla.
“Dati kasi parang may tinik. Kahit masaya kami ni Kylie, mayroong parang…hindi suwabe lahat. Pero ngayon nasa harmony na. One of the best na pakiramdam noong nangyari ‘yung pamamanhikan,” ang pahayag ng aktor sa episode kahapon ng Magandang Buhay.
Dugtong pa niya, “Kasi ‘yung suporta na natatanggap ko from Papa Robin at ‘yung advise sa pagiging ama at pagiging good leader at good provider ay masarap sa pakiramdam ‘yon. So, thankful ako sa kanya.”
Kung matatandaan, namanhikan ang pamilya ni Aljur sa family ni Kylie noong Pebrero at mula nga noon, nagtuluy-tuloy na ang magandang relasyon nila ni Binoe.
Ibinalita rin ni Aljur na inaayos na nila ni Kylie ang kanilang kasal pati na rin ang selebrasyon para sa first birthday ng kanilang anak na si Alas Joaquin sa darating na Aug. 4.