NAPIKON ang isang kongresista makaraan siyang tanungin ng ilang mga kaibigang mambabatas kung totoo ba na girlfriend niya ang kasamahang congresswoman.
Nag-walk out daw sa kwentuhan si Cong na halatang naiirita na sa mga balita na kumakalat dahil sa sinasabing kissing scene sa kanyang mismong tanggapan.
Sinabi ng ating cricket sa Kamara na kalat na ang balita tungkol sa pakikipagtukaan ni Sir sa isang congresswoman na sinasabing hiwalay na sa asawa.
Bata pa ang lady legislator na galing din sa isang kilalang political clan sa Southern Luzon.
May anak na raw si Madam pero napanatili nito ang ganda ng kanyang katawan.
Si Sir naman ay unang sumikat sa kanyang mga kalokohan lalo na noong sila pa ng kanyang dating girlfriend na isang maganda pero may edad na ring aktres.
Mahusay na mambabatas ang ating bida pero hindi mawala sa kanya ang pagiging pilyo bagamat may edad na rin siya.
Kung tutuusin nga ay parang mag-ama sina Cong at Congresswoman dahil sa agwat ng kanilang mga edad.
Pero tunay na walang pinipili ang pag-ibig kaya at wala na tayong magagawa doon sabi pa ng ating cricket.
Si Cong ay matagal na ring walang asawa makaraang mamatay ang kanyang sikat rin na misis ilang taon na ang nakalilipas.
Hindi rin matatawaran ang pagmamahal niya sa pamilya dahil mag-isa niyang itinaguyod ang kanyang mga anak at sadyang iniwasan rin niya ang magkaroon ng karelasyon sa mahabang panahon.
Ang congressman na nahuling nakikipagtukaan sa kanyang tanggapan ay si Mr. R…as in Road.
Ang nalilink naman sa kanyang na congresswoman ay si Miss K…as in Kararula.