BUHAY na buhay ang career ni Alden Richards. Kung titingnan natin ang kanyang kalendaryo hanggang sa mga susunod na buwan ay mapatutunayan natin na halos wala na pala siyang tulog at pahinga.
Linggu-linggo halos ay bumibiyahe siya sa iba-ibang bansa, meron pa siyang mga provincial shows, nandiyan pa ang Eat Bulaga na basta nandito siya ay kailangan niyang mag-report.
Si Alden ang request ng mga producers sa ibang bansa, siya ang pinakaposte ng concert, nagdadagdag na lang sila ng makakasama niya sa kabuuan ng show.
Mahusay humawak ng tagumpay ang Pambansang Bae, hindi siya pinagbabago ng kasikatan at pag-unlad ng kanyang estado sa buhay, kung ano siya nu’ng hindi pa siya sikat ay ganu’n pa rin siya hanggang ngayon.
At nagnenegosyo siya, panalo ang mga pinapasok niyang business, ngayon pa lang ay pinaghahandaan na niya ang kinabukasan nila ng kanyang pamilya.
Kuwento ng isang kaibigan namin, “Pero hindi naman niya pinagdadamutan ang sarili niya. Bumibili siya ng sasakyan na gusto niya. At hindi naman ‘yun basta granatsa lang, necessity ‘yun, ginagamit niya sa malalayong pagbiyahe niya para mag-show.
“Wala siyang kailangang ipaliwanag kahit kanino, siya ang nagpapakamatay sa pagtatrabaho, kailangan niya namang bigyan ng premyo ang pagpapakahirap niya,” madiin nitong komento.
Mismo!