Pickup nabangin; 3 patay

Tatlo katao ang nasawi at tatlo pa, kabilang ang isang pulis, ang nasugatan nang mahulog ang sinakyan nilang pickup sa isang bangin sa Bokod, Benguet, iniulat ng pulisya.

Dead on arrival sa ospital sina Judea Layno, 13; Juleah Layno, 9; at lola nilang si Fely Layno, 60, ayon sa ulat ng Cordillera regional police.

Sugatan naman ang ama ng mga bata na si SPO3 Jeofel Layno, 43; pati sina Judith Layno, 30; at Joreich Layno.

Naganap ang insidente dakong alas-3 ng hapon Sabado, sa bahagi ng National Road na sakop ng Adonot, Brgy. Ambuklao.

Minamaneho ni SPO3 Layno, nakatalaga sa pulisya ng Dupax Del Norte, Nueva Vizcaya, ang Toyota Hilux (RBV-967) nang mahulog sa bagng may lalim na 50 metro, ayon sa ulat.

Isinugod ang mga sakay ng pickup sa Baguio City General Hospital, pero di na umabot nang buhay sina Judea, Juleah, at Fely, ayon sa ulat.

Inaalam pa ang sanhi ng insidente. (John Roson)

– end –