Obrero pisak sa payloader

Patay ang isang lalaki nang aksidenteng maipit ng payloader na kanyang tinuntungan sa pagtatrabaho, sa Santo Domingo, Albay, ayon sa pulisya.

Dead on arrival sa ospital si Rodel Ballatan dahil sa tinamong pinsala sa dibdib, ayon sa ulat ng Albay provincial police.

Naganap ang aksidente dakong alas-8:45 ng umaga Huwebes, sa compound ng Glob Coco Products Manufacturing Corp. sa Brgy. Lidong.

Nagwe-welding si Ballatan at isa pang trabahador habang nakatayo sa bucket ng payloader, nang bigla umanong magloko ang preno ng heavy equipment.

Dahil doo’y umusad ang payloader at naipit si Ballatan sa i-beam ng isang gusali, ayon sa pulisya.