KRIS AQUINO AT WILLIE REVILLAME
MAINGAY ang ikot ng balita na si Kris Aquino na raw ang magiging co-host ni Willie Revillame sa kanyang matagumpay na game show, ‘yun daw ang dahilan kung bakit ilang araw na sinolo lang ni Willie ang pagho-host ng Wowowin, inalis na raw niya ang mga dating co-hosts ng game show dahil malapit na ngang umentra si Kris.
‘Yun ang usap-usapan, pinagpipistahan ‘yun sa mga umpukan, pero hanggang hindi nanggagaling kay Willie ang kumpirmasyon ay mananatiling haka-haka lang ang lahat.
Parang hindi totoo ang kuwento dahil nagkataon lang na may kani-kanyang raket ang mga co-hosts niya pero pagkatapos nu’n ay babalik din agad ang mga ito sa Wowowin.
Maganda kung makapasok sa programa si Kris, dagdag na rating ‘yun para kay Willie at sa show, pero papayag naman kaya ang GMA 7?
Kung matatandaan ay malapit nang sumalang si Kris sa Wowowin, nakahanda na ang lahat, pero may malaking kamay na nagpaliban sa plano ng show.
Naunsiyami si Kris pero matindi ang kayang pasasalamat kay Willie Revillame dahil lahat-lahat ng paraan ay ginagawa na ng aktor-TV host para lang ito matulungan.