PANSAMANTALANG mawawala sa gitna ng aksiyon si John Lloyd Cruz. Sa paliwanag ng mga nag-aalaga sa kanyang karera ay pupunta sa ibang bansa ang sikat at magaling na aktor para may asikasuhin du’n.
Dito pumapasok ang gasgas nang linyang damage control. Pagtatakip. Pagsasalba. Pagbibigay ng leksiyon. Lahat ng mga salitang ito ay pasok na pasok sa sitwasyong kinapapalooban ngayon ni JLC.
Kailangang gumawa ng paraan ang ABS-CBN para maisalba pa ang career ng kanilang posteng artista. Kung kaya pa namang mailigtas ang pinaghirapang career ng aktor ay bakit hindi sila papasok para linawin ang kanyang kinasadlakang kapalaran?
Maganda ang mga salitang ginamit sa pansamantalang pamamahinga ni John Lloyd Cruz, pero sa likod nu’n ay ramdam ang pagsuko na ng Star Magic sa mga kapalaluang ipinakikita ng kanilang artista, ito na lang ang tanging magagawa ng mga nagmamalasakit sa career ni JLC.
Sa isang panahong hindi na nakikinig ang tao, sa isang pagkakataong balewala na sa isang tao ang mga taong nagmamalasakit at nagmamahal sa kanya ay ito na lang talaga ang tanging magagawa ng ABS-CBN, ang pakawalan si John Lloyd Cruz.