NGAYONG Miyerkules, makakasama ni Igan sa Tonight With Arnold Clavio si Haring Gabriel ng Halconia—walang iba kundi ang Kapuso Drama King na si Dennis Trillo.
Gabi-gabing inaabangan ang paglipad ng mga Mulawin at Ravena sa bagong telefantasya ng GMA na Mulawin vs Ravena. At sa unang linggo pa lang ng programa, bumungad na ang exciting na storya, magagandang lokasyon at level-up na special effects!
Ikukuwento ni Dennis ang mga ginawa niyang preparasyon para sa kanyang role at kung ang mga dapat abangan ng mga manonood sa bersyong ito ng Mulawin.
Para naman sa katuwaan, sasalang si Dennis sa segment na “Insta-Truth” kung saan ipapakita ang mga larawan ng kanyang out of the country trips na makikita sa kanyang social media account. Ano kaya ang ibibigay niyang hashtag para sa mga ito? At ano kaya ang memorable experience ang maibabahagi niya?
Tatanungin din ni Igan si Dennis kung ano pang mga bagay, hilig o aktibidad ang nais niyang subukang gayong halos lahat daw ay nasubukan na niya! “Go or No” kaya si Dennis sa motocross, car racing o culinary arts?
At alam ba ninyong hilig ni Dennis ang mag-grocery? Pwes, susubukin ni Igan ang kaalaman niya sa mga presyo ng bilihin ngayon. Sa larong “Higher or Lower?”, mahulaan kaya ni Dennis kung magkano ang tinapay, asukal at itlog?
Lahat ‘yan ngayong Miyerkules na sa Tonight with Arnold Clavio, 10:15 p.m. sa GMA News TV.