Balita

CEBU CITY — INAPRUBAHAN ang P13 kada araw na karagdagang sahod sa mga empleyado ng pribadong sektor sa  Metro Cebu. Pinayagan ng  Regional Tripartite Wages and Productivity Board sa Central Visayas (RTWPB-7) ang umento sa minimum na arawang sweldo para sa mga pribadong manggagawa sa Metro Cebu matapos ang isinagawang deliberasyon na nagsimula ganap na alas-9 ng umaga at natapos ganap na ala-1 ng hapon kahapon. Sakaling ipatupad na ang umento, aabot na sa P366 kada araw ang minimum sa arawang sweldo sa Metro Cebu mula sa kasalukuyang P353. Sinabi ng abogadong si Ernesto Carreon, RTWPB-7 labor representative, na magpupulong ang wage board susunod na linggo para magdesisyon kung isasama sa umento ang mga lugar sa Central Visayas, partikular sa Bohol, Siquijor at iba pang bahagi ng  Cebu. Idinagdag ni Carreon na idinahilan ng ilang miyembro na hindi dapat ibigay ang karagdagang sweldo sa ilang lugar kagaya ng Bohol, kung saan mas mataas ang tinatanggap ng mga empleyado kumpara sa mga manggagawa mula sa  Butuan City at Cagayan de Oro City. Ayon pa kay Carreon, napagkasunduan din nila na itaaas ang minimum na sweldo ng mga kasambahay sa P3,000 in Cebu City mula sa kasalukuyang P2,500. Ibinasura rin ng wage board ang panukalang P100 kada araw na umento sa sahod.