NGAYONG lumantad na sila ni Kylie Padilla tungkol sa pagdadalantao ng aktres ay mas magiging maganda siguro kung medyo tatalian ni Aljur Abrenica ang pagkokomento nang may kaanghangan sa pandinig at panlasa.
Tama na muna ang mga emosyong puwede namang itago, huwag nang nagsasalita ng kung anu-anong tirada na maglalagay sa kanya sa alanganin, hindi makagaganda ‘yun sa kanyang imahe.
Kay Aljur mismo nanggaling na gamit na gamit daw ng GMA 7 ang isyu ng pagdadalantao ni Kylie.
Palagi raw binabanggit ang programang Encantadia kapag nagiging isyu ang kalagayan ng kanyang girlfriend ngayon.
Natural, ano ang paglalarawang sasabihin tungkol kay Kylie, artista ito ng Ang Probinsyano, ganu’n ba ang gustong ipakahulugan ni Aljur?
Kasama si Kylie sa programa, papatayin ang kanyang role, dahil nga sa mabilis na paglaki ng tiyan nito. Anong palabas kaya ang puwedeng banggitin patungkol sa kalagayan ng dalaga, meron pa kayang iba, bukod sa Encantadia?
Heto na naman si Aljur. Minsan na siyang nakipagbanggaan sa kanyang mother studio. Umabot pa nga sa husgado ang kanyang mga reklamo.
Pero sino ba ang nabukulan nang gawin niya ang paglaban sa kanyang istasyon, kaninong career ba ang naapektuhan, sino ba ang nagsumamong magbalik na lang uli sa kanyang bakuran?