Tinatapos pa ng Office of the Ombudsman ang imbestigasyon na may kinalaman kina dating Pangulong Gloria Macapagal Arroyo at dating Pangulong Noynoy Aquino.
Ayon kay Ombudsman Conchita Carpio Morales inaasahan niya na mapapasakamay na niya ang ulat ng mga Ombudsman investigators sa kaso ng Malampaya Fund scam ngayong buwan.
“I assure you I follow that up every now and then to see to it that the Malampaya case could be resolved once and for all,” ani Morales sa Meet Inquirer Forum.
Minanipula umano ang Malampaya Fund upang mapunta sa mga bogus na non-government organization ni Janet Lim Napoles, na sangkot din sa pork barrel fund scam.
Nangyari ito noong panahon ng Arroyo government.
Iniimbestigahan din ng Ombudsman ang Mamasapano incident kung may pananagutan si Aquino sa pagkamatay ng 44 miyembro ng Special Action Force, gayundin ang Disbursement Acceleration Program Fund na ipinagbawal ng Korte Suprema.
Pero sinabi ni Morales na ‘corrupt-free’ si Aquino.
“You have to give it to him. He is corrupt-free,” ani Morales. “It’s leadership by example. It’s probably because of his being not corrupt, he did it by example.”
Sinabi naman ni Morales na hindi lahat ng nasa gobyernong Aquino ay malinis.
“There are pending cases against Aquino. I think still under investigation. We call it active,” dagdag pa ni Ombudsman.
Si Aquino ang nagtalaga kay Morales bilang Ombudsman noong 2011.