GUMAWA ng kasaysayan sa Philippine Basketball Association (PBA) si San Miguel Beermen center June Mar Fajardo matapos makuha ang ikatlong sunod na season Most Valuable Player award sa ginanap na 2016 PBA Annual Awards Biyernes ng gabi sa Smart Araneta Coliseum sa Cubao, Quezon City.
Maliban sa ikatlong MVP award na napanalunan niya, ipinagkaloob din kay Fajardo ang ‘Samboy Lim’ Sportsmanship Award.
Napabilang din si Fajardo sa Mythical First Team na binubuo nina TNT KaTropa Texters guard Jayson Castro, Globalport Batang Pier guard Terrence Romeo, Alaska Aces forward Calvin Abueva at San Miguel Beermen forward Arwind Santos.
Ang Mythical Second Team ay kinabibilangan naman nina San Miguel Beermen playmaker Alex Cabagnot, Barangay Ginebra Gin Kings teammates LA Tenorio at Japeth Aguilar at sina NLEX Road Warriors stalwarts Paul Asi Taulava at Sean Anthony.
Ang All-Defensive Team ay kinatampukan nina Rain or Shine guard Gabe Norwood, SMB playmaker Chris Ross, Alaska guard Ping Exciminiano, Star Hotshots forward Mark Pingris at Aguilar.
Pinarangalan naman bilang Rookie of the Year si Meralco Bolts guard Chris Newsome habang tinanghal na Most Improved Player si Rain or Shine Elasto Painters combo guard Jericho Cruz.