NAKUMPISKA ng mga miyembro ng Special Action Force (SAF) ang isang submachine gun at iba pang mga baril sa loob ng dormitoryo ng convicted na drug lord na si Peter Co sa Quadrant 4 Dormitory 2-B Maximum Security Compound ng New Bilibid Prison (NBP).
Noong Hulyo, pinangalanan ni Solicitor General Jose Calida si Co bilang isa sa mga drug lord na may koneksyon sa mga general ng pulis.
Dating nakakulong si Co Dormitory 2-B bago siya inilipat sa National Bureau of Investigation (NBI) matapos ang isinagawang raid ng mga otoridad kung saan nadiskubre ang mga appliance, matataas na kalibre ng baril at mga gadget.
Mula sa NBI, inilipat siya sa Building 14, ang lugar para sa mga high risk inmate.
Ngunit noong Agosto, sinabi ni Justice Secretary Vitaliano Aguirre II na nakakumpiska pa ang SAF ng mga baril sa loob ng Building 14. Nakumpiska rin mula kay Co ang tatlong cellphones.
Bukod sa submachine gun, nakumpiska rin ng mga SAF ang tatlong pirasong .45 caliber at isang 9 mm caliber at isang flat screen na telebisyon.
Nakumpiska rin ng SAF ang shabu, drug paraphernalia, at mga mobile phone sa iba pang mga quadrant ng Maximum Security Compound.