Kinumpleto ng Croatia at Spain ang walong koponang aabante sa quarterfinals ng men’s basketball sa 2016 Rio Olympics matapos pagwagian ang kani-kanilang huling laban sa preliminary round.
Pinadapa ng mga Espanyol ang Argentina, 92-73, habang sumandal ang mga Croatian kay Bojan Bogdanovic tungo sa 90-81 pagpapatumba sa Lithuania upang buuin ang apat na bansa sa Group B kasalo ang mga bansang kanilang tinalo na may magkakatulad na 3-2 karta. Nalaglag naman ang African powerhouse Nigeria at host Brazil.
Sa format ng kumpetisyon, isang knockout crossover match ang magaganap kung saan makakaharap ng #1 seed ng isang pangkat ang #4 ng kabila at ng #2 laban naman sa #3.
Kung kaya makakasagupa nang USA (#1 A) ang Argentina (#4 B); Australia (#2 A) kontra Lithuania; France (#3 A) laban sa Spain (#2 B) at hahamunin ng Serbia (#4 A) ang Croatia (#1B) na hahataw sa Agosto 17.
Mula rito ang apat na magwawagi sa kani-kaniyang laro ang uusad sa semifinals tungo sa inaasam na gintong medalya.
Nanguna para sa world number two Spain si Rudy Fernandez na may 23 puntos at pitong rebounds habang may 19 markers at 13 rebounds si NBA star Pau Gasol. Umiskor si Bogdanovic ng 22 puntos para naman sa panalo ng Croatia.
MOST READ
LATEST STORIES