NASA bansa na uli si Kris Aquino, tapos na ang dalawang buwan nilang bakasyon nina Josh at Bimby, magtatrabaho na uli ang aktres-TV host sa kanyang pagbabalik.
Hindi masyadong na-miss ng kanyang mga tagasuporta si Kris dahil kahit nasa ibang bansa siya ay sige-sige pa rin ang pagpo-post niya ng mga pictures nilang mag-iina, marami rin siyang kuwento, kaya parang nandito lang din siya. May kumalat na balita na lilipat na raw sa GMA 7 si Kris, isang kuwentong nagpataas ng kilay ng mas nakararami, dahil malayo ang posibilidad nu’n.
Balitang inaayos na ng ABS-CBN ang mga gagawin niyang shows, nag-uusap na rin ang magkabilang kampo kung ilang taong kontrata ang kanyang pipirmahan, malayong umalis sa Dos si Kris. Kahit siguro bali-baligtarin si Kris ay hindi niya tatalikuran ang network na nag-alaga sa kanya nang matagal na panahon. Nagkakaroon man sila ng tampuhan paminsan-minsan ay natural lang naman ang ganu’n para mas maging maayos ang kanilang samahan.
Sabik na ang manonood sa mga bagong programang pagbibidahan ni Kris Aquino, iba naman kasi talaga siyang umatake, ibinibigay niya ang lahat-lahat kahit siya pa ang malagay sa alanganin. Isa lang ang isinasagot niya kapag panay-panay ang pamba-bash sa kanya, “E, kasi, sikat ako! Kung wala akong dating sa kanila, hindi naman nila ako papansinin!” Ha! Ha! Ha! Ha!