ITINANGGI ng 16 na preso mula sa New Bilibid Prison (NBP) na nagkukuntsabahan sila para ipapatay si President-elect Rodrigo Duterte at incoming Philippine National Police (PNP) Chief Ronald dela Rosa.
Nauna nang ibinunyag ni dela Rosa na nag-aalok ng pabuya ang mga drug lord para sa ulo niya at ni Duterte.
Idinagdag ni dela Rosa na mula sa P10 milyon, itinaas sa P50 milyon ang pabuya para s kanila ni Duterte.
Ngunit ayon sa source ng INQUIRER.net mas malaki na ang pabuya matapos mag-alok ng P50 milyon ang kada isang drug lord.
“Kami ay nanindigan na walang sinuman sa amin ang sangkot sa planong ito kung totoong mayroon man,” sabi ng manifesto na pinirmahan ng 16 na preso, na ipinadala sa Justice Secretary Emmanuel Caparas.
Kabilang sa mga pumirma sa manifesto ay sina Jaime Patcho, German Agojo, Mario Tan, Jerry Pepino, Engelberto Durano, Rodel Castellano, Tomas Donina, Noel Martinez, Eustaquio Cenita, Herbert Colangco, Jojo Baligad, Clarance Dongail, Rico Caja, Joel Capones, Gilberto Salguero, at Edgar Sayo Cinco.