OAKLAND, California — Sinamantala ng Golden State Warriors ang pagkawala ni Kevin Love para durugin ang Cleveland Cavaliers, 110-77, sa Game 2 ng 2016 NBA Finals at mahablot ang 2-0 bentahe sa kanilang best-of-seven championship series Lunes ng umaga.
Pinangunahan ni Draymond Green ang Golden State sa itinalang 28 puntos at pitong rebounds habang si Stephen Curry, na na-foul trouble sa kabuuan ng laro, ay nagtapos na may 18 puntos at siyam na assists.
Si Klay Thompson ay umiskor naman ng 17 puntos at ang Splash Brothers ay bumitaw ng 8 for 16 mula sa 3-pointers matapos na alatin sa kanilang panalo sa Game 1 noong Biyernes.
Si Leandro Barbosa ay nagdagdag ng 10 puntos para sa Warriors.
Sa naunang 31 koponan na nanguna sa title series ng 2-0, 28 dito ang napanalunan ang titulo. Ang Miami Heat ang huling koponan na nakabangon buhat sa 0-2 deficit sa Finals kung saan tinalo ang Dallas Mavericks noong 2006.
“There’s no point in celebrating or jumping up and down saying, ‘Look at us.’ We’re two games away from winning a championship, but we still have to go out and get the job done,” sabi ni Curry. “It’s a trap to think that we’ve figured things out, that we have the perfect formula to beat Cleveland and they have no chance in the series. That’s not how we’re supposed to think.”
Kumamada si LeBron James ng 19 puntos, siyam na assists at walong rebounds para pamunuan ang Cavaliers na babalik sa Cleveland na naghahabol sa 0-2 deficit at hindi nakakasiguro kung makakapaglaro si Love sa Game 3.
Si Kyrie Irving ay nag-ambag ng 10 puntos para sa Cavs.
“It’s hard for me to pinpoint what’s not working and what could work right now,” sabi ni James. “Obviously not much is working.”
Aksidenteng nasiko ni Golden State forward Harrison Barnes si Love sa ulo habang naghahabol ng rebound sa ikalawang yugto. Nalugmok naman sa sahig si Love hawak ang kanyang ulo ng ilang minuto at ineksamin sa bench matapos tumawag ng timeout.
Nakabalik si Love sa laro para tapusin ang first half at nag-start sa ikatlong yugto bago tuluyang bumalik sa locker room bunga ng tinamong concussion.
Tinapos ni Love ang laro na mayroong limang puntos mula sa 2-for-7 shooting sa halos 21 minutong paglalaro.
Ang 33-puntos na panalo ng Warriors ay ang pinakatambakang panalo sa isang finals game.
Ang Warriors ay mayroon ng 87 panalo ngayong season — 73 sa regular season at 14 sa playoffs — para tapatan ang record na itinala ng 1995-96 Chicago Bulls.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.