Laro sa Miyerkules
(Araneta Coliseum)
7 p.m. Alaska vs Rain or Shine
(Game 6, best-of-7 finals)
NAGLATAG ang Alaska Aces ng matinding depensa para padapain ang Rain or Shine Elasto Painters, 86-78, sa Game Five ng kanilang 2016 Oppo PBA Commissioner’s Cup best-of-seven championship series kahapon sa Smart Araneta Coliseum sa Cubao, Quezon City.
Gumawa si Calvin Abueva, na nakuha ang kanyang kauna-unahang Best Player of the Conference award noong Biyernes, ng double-double sa itinalang 20 puntos at 13 rebounds para pangunahan ang Aces na nanatiling buhay ang pag-asang makuha ang titulo matapos idikit ang kanilang serye sa 3-2.
“Nung una na-straight kami 3-0 pero ngayon kasi nakaka-recover na kami,” sabi ni Abueva, na naglaro ng 34 minuto mula sa bench. “Kailangan pa namin ma-limit mga shooters nila.”
Si Rob Dozier ay nagdagdag ng 14 puntos, si RJ Jazul ay nag-ambag ng 13 puntos, si Dondon Hontiveros ay gumawa ng 12 puntos at si Cyrus Baguio ay may 11 puntos para sa Alaska na tatangkaing itabla ang kanilang serye sa 3-3 sa darating na Miyerkules.
Si Jeff Chan ay kumana ng 17 puntos habang si Paul Lee ay nagtala ng 16 puntos para pamunuan ang Elasto Painters na nalimitahan ang opensa.