BINANTAAN ng Kapuso actress na si Vaness del Moral ang isang anonymous texter na ayaw tumigil ng panghaharas sa kanya. Ayon kay Vaness na napapanood sa GMA Telebabad series na Because Of You nina Carla Abellana at Gabby Concepcion, nakakatanggap siya ng mga bastos at mahahalay na text message mula sa isang di kilalang sender.
Sa kanyang Instagram account, nirepost ng dalaga ang news report tungkol sa bagong ordinansa sa Quezon Ciy na nagbabawal sa sinuman na mambastos ng mga babae sa kalye. Sa nasabing city ordinance ipinagbabawal na ang anumang uri ng pagsipol, pagtawag ng atensiyon sa isang babae na naglalakad sa kalye, at iba pang klase ng pambabastos na nagaganap sa kalye.
Ipinost din ni Vaness sa IG ang screenshot ng text message sa kanya ng anonymous sender kung saan niyaya siyang makipag-one-night stand at babayaran daw siya ng P30,000. Matapang pang mensahe ni Vaness, “Dahil ito ay naaayun sa una kong post. Ito? Hindi ba ito sexual harrasment? Whoever you are, stop or I will sue you!”