PAOLO BALLESTEROS
PALAISIPAN pa rin hanggang ngayon para sa mga Dabarkads ang tunay na dahilan ng pagsuspinde ng TAPE Inc., kay Paolo Ballesteros sa Eat Bulaga. Nag-aalala rin sila na baka hindi na bumalik ang TV host-actor sa noontime show ng GMA.
Balitang six months ang itatagal na suspension order ng management kay Paolo, kaya ayon sa mga netizens, siguradong matindi ang nagawang kasalanan ng make-up transformation king kaya ganu’n katagal siyang mawawala sa Eat Bulaga.
Kahapon, siniguro naman ni Paolo na muling mabubuo ang tatlong lola ng Eat Bulaga kalyeserye sa gagawin nilang show sa Amerika na nagsimula na nga kahapon. Sa isang Instagram post ni Paolo, makikitang magkasama sila ni Wally Bayola sa waiting lounge ng airport para sa kanilang US flight.
Wala si Jose Manalo sa mga ipinost na photos ni Paolo pero nasa poster din ng US concert ng JoWaPao ang picture ni Jose. Nilagyan pa niya ito ng caption na: “See you later mga Dabarkads sa Amerika!
Wooooh!”
Base sa mga comments na nababasa namin sa social media, nakikiusap ang ilang netizens na sana’y ibalik na si Paolo sa EB para kumpleto uli ang kasiyahan sa kalyeserye.