PANGTANGGAL stress ni Heart Evangelista ang kambal na anak ni Sen. Chiz Escudero na sina Chesi at Quino. Malapit na malapit na ang dalawang bagets sa Kapuso actress dahil na rin sa regular bonding moments nila.
Ayon nga kay Chiz, mas klik pa ang kambal sa kanilang Tita Heart dahil na rin daw sa mas konti ang age gap nila. Dahil magiging 31 anyos pa lang si Heart sa Peb. 14, mas alam daw ng kanyang asawa ang mga kinahihiligan ng mga kabataan ngayon lalo na ang mga usong kanta.
“Mas nagkakasundo sila siguro kasi mas malapit yung edad ni Heart sa anak ko kaysa ako,” sey ni Chiz sa isang panayam. Kamakailan ibinahagi ni Heart sa kaniyang mga follower sa Instagram ang letter ni Chesi sa kanila ni Chiz na labis na ikinatuwa ng aktres.
“Dear Tita Heart and Daddy, Thank you for being kind and for teaching me how to act properly. I am sorry that sometimes I don’t follow you. I am happy that I have both of you.
Love, Chesi,” ang laman ng maikling sulat ni Chesi. Masaya si Chiz sa mga pangyayari dahil palagi raw niyang isinasaalang-alang ang kaniyang mga anak sa naunang asawa. “Sa ngayon kasi nasa mura pa silang edad, mas ako ang nagdedesisyon para sa kanila.
Pero, kabilang palagi sa pagdedesisyon ko ang mga anak ko. Maski na noong nagpakasal ako kay Heart. Tinanong ko rin sila,” paliwanag pa ng senador.
Sey naman ni Heart, nawawala ang pagod at stress niya kapag nakakasama sila ng kambal, iba pa rin daw kasi ang feeling kapag mga bagets ang kasama niya sa paglalaro at pagbabasa.