John Lloyd Cruz hindi tatanggapin ang award kung nanalo

Kung nanalong best actor sa Metro Manila Film Festival, hindi umano ito tatanggapin ng aktor na si John Lloyd Cruz.
Sa kanyang pagharap sa media bago ang pagdinig ng House committee on Metro Manila Development, sinabi ni Cruz na hindi niya matatanggap ang award dahil ibinase ito sa kanyang pelikulang Honor Thy Father na disqualified sa best picture category.
“Yun yung problema ko, because I was nominated for best actor and I wasn’t sure if I wanted to accept the award. I did not win, for the record, kung nanalo po ako I would have said something like ‘kung nanalo akong best actor dito saan ninyo po ibinase yung performance ko sa isang pelikulang disqualified. Kaya siguro i was ready to actually reject the award,” ani Cruz.
Diniskuwalipika ang Honor Thy Father dahil hindi umano ipinaalam sa MMFF na naipalabas na ito bago pa ang kompetisyon.
Sinabi ni Cruz na siya ay dumalo sa pagdinig hindi para maghabol sa best picture award kundi para magkaroon ng reporma sa MMFF at mapalabas ang entertainment industry ng bansa.
“Mas malaki na po ito doon (award) ang pinaguusapan na dito yung estado at yung future ng mga pelikulang Piipino,” dagdag pa ni Cruz.
Ayon kay Cruz, wala ring katiyakan kung mananalo ang Honor Thy Father kung hindi ito nadiskuwalipika.
“It’s anybody’s game, just don’t take away the opportunity to experience a fair game kung na-disqualify ibig sabihin tinanggalan mo kami ng karapatan na lumaban. Tinanggalan nyo kami ng karapatan na magkaroon ng fair chance dun sa competition were not saying na kung hindi na disqualify na mananalo kami, we don’t know that pero ang alam ko lang dahil sa disqualification natanggal kami ng opportunity ng pagkakataon para malaman kung pain nag-perform young aming pelikula sa panlasa nila,” saad ng aktor.