Laro Ngayon
(Cuneta Astrodome)
4 p.m. Petron vs Foton
(Game 2, best-of-three Finals)
TATANGKAING wakasan ng Foton ang pamamayagpag ng Petron sa Philippine SuperLiga (PSL) sa pagwalis ng kanilang best-of-three PSL Grand Prix championship series ngayong alas-4 ng hapon sa Cuneta Astrodome, Pasay City.
Inaasahan na totodo ang Tornadoes para makubra ang unang korona sa prestihiyosong inter-club tournament na hatid ng Asics at suportado ng Milo katuwang ang Senoh, Mikasa at Mueller bilang technical partners at TV5 bilang official broadcaster.
Pinamumunuan ng matatangkad na frontline na binubuo ng American imports na sina Lindsay Stalzer at Katie Messing kasama ni national team mainstay Jaja Santiago, ang Tornadoes ay nagkaroon ng mabagal na panimula bago biglang rumatsada sa ikalawang round para makuha ang karapatang makasukatan ang top seed na Philips Gold sa isang do-or-die semifinals.
Ginulat ng Tornadoes ang Lady Slammers sa isang klasikong limang set na duwelo para umabante sa finals kontra Blaze Spikers, na kinokonsidera bilang pinakamalakas na koponan sa liga dahil sa mga beteranong manlalaro na hinubog na nang karanasan sa pagwawagi sa mga laban.
Sa finals ay nakita ang pag-angat ng laro ng Tornadoes sa mas mahusay na lebel.
Matapos na matalo sa opening set, sinandalan ng Foton ang matinding net defense, ang halos walang sablay na reception at malupit na atake para dominahin ang Petron sa ikalawa at ikatlong set.
Sa ikaapat na set ay tuluyang gumuho ang laro ng Blaze Spikers para ibigay sa Tornadoes ang 14-25, 25-21, 25-19, 25-22 panalo.
Bagamat nakauna sila sa laban, hindi naman nagkukumpiyansa si Foton coach Villet Ponce-de Leon.
“The job is not yet done. We’re not yet ready to relax,” sabi ni Ponce-de Leon, na siyang gumabay sa Blaze Spikers sa kanilang mga naunang kumperensiya sa liga.