Laro Ngayon
(Araneta Coliseum)
3:30 p.m. FEU vs UST
(Game 2, best-of-three Finals)
MAKUHA ang ika-20 UAAP men’s basketball title ang tutumbukin ngayon ng Far Eastern University Tamaraws sa pagsagupa nila sa University of Santo Tomas Growling Tigers sa Game 2 ng UAAP Season 78 men’s basketball best-of-three finals.
Ang inaasahan na dudumugin at pukpukang pangkampeonatong laro ay magsisimula sa ganap na alas-3:30 ng hapon sa Smart Araneta Coliseum sa Cubao, Quezon City.
Lumapit ang Tamaraws sa isang panalo na lang tungo sa pagkubra ng korona matapos daigin ang Tigers sa Game 1, 75-64, noong Miyerkules sa Mall of Asia Arena.
Muli namang sasandalan ni FEU coach Nash Racela sina Mark Belo, Mike Tolomia, Roger Pogoy, Russel Escoto at Prince Orizu para pawiin ang 10 taon na title drought ng koponan.
Aasahan naman ni UST mentor Bong dela Cruz sina Kevin Ferrer, Karim Abdul at Ed Daquioag para makahirit ang Tigers ng winner-take-all Game 3.