MAINE MENDOZA AT ALDEN RICHARDS
SOBRANG kilig na naman ang umariba sa mga tagahanga nina Alden Richards at Maine Mendoza nang magselos si Yaya Dub sa Russian model na si Cindy.
Naghampasan na naman ang magkakatabing nanonood ng kalyeserye nang sabihin ni Yaya Dub na baka raw kasi siya ipagpalit ni Alden sa Russian model dahil maganda ito, makinis at matangkad pa.
Natural, umiling-iling ang guwapong binata, kasabay ang pagsasabing nakatuon lang ang kanyang atensiyon kay Maine. Aysus, sangkatutak na text messages na kaagad ang tinanggap namin nang dahil du’n.
Nang sitahin ni Maine si Alden na bakit daw hindi agad inalis ng binata ang kanyang kamay nang mag-holding hands sila ni Cindy, ‘yun na, nagpalakpakan at kinilig na nang todo ang AlDub Nation.
Hindi pa rin tapos ang makasaysayang kuwento ng kalyeserye, napakarami pang twist na mangyayari sa kuwento ng pagmamahalan ng AlDub, hindi kinakapos ng katas ng mga ideya ang utak ng mga writers ng Eat Bulaga.
Nag-iimbita pa rin ng kilig ang mga eksena, nagmimistulang sorpresa ang pagpasok sa kuwento ng magagaling at sikat na artistang tulad nina Ms. Gloria Romero at Ai Ai delas Alas, kaya saan ka pa?
Hanggang ngayon ay nagpapakalat pa rin ng epidemya ang AlDub. Willing victims pa rin ang ating mga kababayan.