MULING pinatunayan ng Pambansang Bae na si Alden Richards ang pagiging “Mall Show King” matapos sumugod ang libu-libong Ilonggo sa Kapuso Fans Day ng binata na ginanap sa Robinsons Place Iloilo noong Biyernes.
Ayon sa ulat, umabot daw sa humigit-kumulang 50,000 katao ang nagtungo sa mall show ni Alden sa Iloilo. Meaning, halos magkasing-dami ang nanood doon sa nagtungo sa “Tamang Panahon” fans day ng Eat Bulaga sa Philippine Arena.
At dahil dito, gumawa na naman daw ng history si Alden pagdating sa mga ginaganap na mall show sa Iloilo. Umaga pa lang daw ay dagsa na ang mga tao sa paligid ng nasabing mall para makita up close and personal si Alden.
Isinarado rin sa trapiko ang ilang pangunahing kalye sa lugar dahil nga punumpuno na ang mga ito ng AlDub fans. Bago ito, umapaw din ang mga tao sa mall show ni Alden sa Cebu, Cavite, Bulacan at iba’t ibang bahagi ng Metro Manila.
Samantala, muling pinakilig nina Alden at Maine Mendoza alyas Yaya Dub ang buong mundo matapos nilang gayahin sina Guy & Pip (Nora Aunor at Tirso Cruz III) sa special performance nila sa “Gaya Gaya Pa More” grand finals ng Eat Bulaga kahapon.
Ni-lip sync nina Alden at Maine ang ilan sa signature songs ng Guy & Pip tulad ng “Maria Leonora Teresa”, “Tiny Bubbles”, “Pearly Shells” at “Together Again” kung saan nag-duet na ang dalawa.
Ayon sa mga netizen, ang AlDub na ang maaaring pumalit sa trono nina Ate Guy at Pip. Maituturing din kasing phenomenal ang tambalan ng dalawa noong dekada ‘70.
Ito ‘yung panahon kung saan nag-iiyakan at nakikipag-away din ang mga fans para ipagtanggol ang kanilang mga idolo.
Ganito rin ang nangyayari ngayon sa loveteam nina Alden at Yaya Dub na ilang beses nang nangwasak ng record sa kasaysayan ng telebisyon, pati na rin sa social media.
Kahapon sa pagpapatuloy pa rin ng kalyeserye ng Eat Bulaga, nabitin na naman sa kilig ang mga manonood. Pagkatapos kasing mag-perform nina Yaya at Alden sa “Gaya Gaya Pa More”, mag-dubsmash at mag-duet, balak na sanang ibigay ni Alden ang singsing na nakuha nila sa mahiwagang jewelry box mula sa Bahay ni Lola kay Maine.
Ngunit pagbukas ni Alden ng alahasan, na-shock ang lahat dahil wala na ang singsing. Galit na galit si Lola Nidora (Wally Bayola) at sinabing hindi kailangang mawala ang singsing.
Sino nga kaya ang nagnakaw nito? May bagong karakter na naman kayang papasok sa susunod na linggo? Yan ang dapat abangan sa Lunes.