KAKAIBA talaga ang “magic” ng isa sa mga pambatong child stars ng ABS-CBN na si Jana Agoncillo na napapanood araw-araw sa seryeng Ningning. Imagine, kahit si Sen. Grace Poe ay umaming gustung-gusto niya ang bagets lalo na kapag naglilitanya na ito ng mahahaba niyang dialogues sa TV.
Kumalat sa social media ang litratong ipinost ng senadora sa Instagram na kuha nang sila’y magkita sa isang okasyon, “I met Ningning’s lead child actress today, it was so nice to see you Jana! You truly are a talented and smart young girl 🙂 All the best dear,” ang caption nito sa picture.
Marami ang hindi nakakaalam na minsan ding naging child star ang anak ni Da King Fernando Poe, Jr. at ng Reyna ng Pelikulang Pilipino na si Ms. Susan Roces. Siya ang gumanap na anak ni Pacquito Diaz sa pelikula ni FPJ na “Durugin Si Totoy Bato.”
Bukod pa sa 1979 movie ng kaniyang ama at ni Ms. Charo Santos, gumanap din ang senadora na isang batang palaboy sa isa pang pelikula ni Da King na “Dugo Ng Bayan.” At tulad nga ng naging pahayag sa isang panayam ni Ms. Susan, ito siguro ang dahilan kung bakit malapit sa mga bata ang kanyang anak at naging adbokasiya na niya ang pagtatanggol sa mga karapatan ng mga bata bilang isang mambabatas.
Matatandaan na isa sa mga panukalang batas na isinulong ni Grace sa Senado ay ang “First 1,000 days” bill na naglalayong proteksyunan ang kalusugan ng mga batang bagong silang hanggang sila ay ma-ging dalawang taong gulang.