HINDI napahiya ang mga napaborang kabayo sa mga malalaking karerang pinaglabanan sa Mayor Ramon Bagatsing Cup Racing Festival kahapon sa San Lazaro Leisure Park sa Carmona, Cavite.
Walang naging problema si Low Profile na dinomina ang Challenge of Champions Cup habang kinailangan ni Gentle Strength ang malakas na pagtatapos para tanghaling pinakamahusay sa Mayor Ramon Bagatsing Sr. Division I para sa 3YO Open local.
Na-scratch ang premyadong kabayo na si Hagdang Bato sa 1,750 metrong distansyang karera upang walang nakasabay sa tulin na ipinakita ni Low Profile tungo sa banderang-tapos na panalo.
May tiyempo na 1:50.4 si Low Profile at halos pitong dipa ang layo nito sa rumemateng si Oh Oh Seven sa pagdiskarte ni Jessie Guce.
Sa rekta naman bumulusok si Gentle Strength na dinala ni Jonathan Hernandez para maipagpag ang malakas ding pagdating ng katunggaling si Dikoridik Koridak tungo sa isang ulong lamang sa meta.
May 1:53.6 winning time si Gentle Strength at tulad ni Low Profile ay nagkamit din siya ng P600,000 unang gantimpala mula sa P1 milyong premyo na pinaglabanan.
Nakisalo rin sa mga kuminang sa P1 million race ay si Spectrum na dinala ni Dan Camanero at nangibabaw sa 2015 Philracom 1st Leg Juvenile Fillies/Colts Stakes race.
Sa 1,000m distansya isinagawa ang karera para makapaghatid ng pangalawang P600,000
premyo sa kanyang connections.
Bago ito ay nanalo na si Spectrum sa PCSO Maiden Race noong Hulyo 25.