INATASAN kahapon ng Court of Appeals (CA) ang isang paaralan na bigyan ng certificate of good moral character si Krisel Mallari, ang 16-na-taong-gulang na salutatorian na pinatigil habang nagtatalumpati sa kanilang graduation matapos ang pagbatikos nito.
Sa isang resolusyon, nagpalabas ang Second Division ng CA ng writ of preliminary injunction kung saan ipinag-utos nito sa Santo Niño Parochial School (SNPS) ang agarang pagbibigay kay Krisel ng kanyang certificate of good moral character.
Hindi makapasok si Krisel sa University of Santo Tomas (UST) dahil ayaw siyang bigyan ng sertipikasyon.
“It is of judicial notice that the UST starts its classes on the first semester anytime within the month of August 2015. In this regard, and considering that time is of the essence, this Court reiterates its order that SNPS should issue a certificate of good moral character in favor of Krisel immediately upon receipt of this resolution,” sabi ni Associate Justice Socorro Inting.
Idinagdag ni Inting na ang ginawa ni Mallari ay hindi dapat makaapekto sa kanyang kinabukasan.
“Krisel, just like any other child, commits transgressions and therefore, must be disciplined. However, the manner by which she is disciplined should not go to the extent of spoiling or destroying her dreams and aspirations,” sabi pa ng CA.