“WOW na wow naman ‘yun.”
Ito ang naging sagot ni Vice President Jejomar Binay sa patama ni Pangulong Aquino laban sa kanya matapos ang ika-anim at huling State of the Nation Address (SONA) Lunes.
“Merong isang bahagi doon palagay ko hindi naman ako pinatutungkulan ‘nun. Kasi ang pagkakasabi meron diyan nagsasalita na giginhawa ang bayan pero ang salita lage ay basta, basta. Wow na wow naman ‘yun,” sabi ni Binay.
Sa kanyang talumpati, binatikos ni Aquino ang mga kritiko na ayaw kilalanin ang kanyang Tuwid Na Daan.
“Sa mga medyo may edad po, ang isasagot dito, ‘Ah ganun?’ Sabay taas ng kilay. Para naman sa kabataan, iba na raw po ang tugon nila sa ganoong pahayag, iba na daw po ang uso ngayon eh: ‘E di wow!’,” sabi ni Aquino sa kanyang SONA.
Nauna nang sinabi ni Binay na magsasagawa siya ng kanyang sariling SONA.