TED FAILON
Maraming nagtutulak sa magaling na news anchor na si Ted Failon na balikan ang mundo ng pulitika.
Minsan na siyang naging kinatawan ng kanilang distrito sa Leyte, naging maayos ang kanyang serbisyo, kaya iniimbitahan uli siya ng mga tagaroon para kumandidato sa halalan sa susunod na taon.
Pero mukhang wala na sa bokabularyo ngayon ng magaling na news anchor-komentarista ang pulitika.
Gusto na niya ng isang tahimik na buhay, ‘yung kanyang-kanya ang oras niya, dahil sa kanyang mga anak na sina Kaye at Karishma.
Naranasan na niya ang pagseserbisyo-publiko, para kay Ted Failon ay naibigay niya naman ang mga pangangailangan ng kanyang mga nasasakupan, okey na sa kanya ang ganu’n.
Kahit naman wala siya sa mundo ng pulitika ay angat pa rin ang pagseserbisyo niya para sa ating mga kababayan sa pamamagitan ng kanyang radio program sa DZMM.
Walang maipampagamot, walang pampalibing, walang pambayad sa ospital—lahat ‘yun ay ginagawan niya ng paraan para makatulong sa mga lumalapit sa kanyang programa.
Tama na sa kanya ang pagraradyo araw-araw, ang kanyang programang Failon Ngayon na puro makabuluhang paksa ang tinututukan, totoong-totoo naman na kahit wala kang upuan sa pamahalaan ay makatutulong ka pa rin sa mga nangangailangan.
Isa si Ted Failon sa mga news anchor-komentaristang nirerespeto ng mga Pinoy dahil sa kanyang matinding paninindigan.