HAHARAP sa malaking hamon ang mga karakter ng Kapamilya chinito heartthrobs na sina Richard Yap at Enchong Dee sa pagpapatuloy ng kanilang Wansapanataym special na My Kung Fu Chinito ngayong Linggo.
Sa pagbubunyag ni Chairman Tai (Richard) na si Diego (Enchong) ang magiging susunod na Kung Fu Chinito, sasailalim si Diego sa isang pagsasanay upang matutunan niya kung paano gamitin ang kapangyarihan na ipagkakaloob sa kanya.
Tatanggapin ba ni Diego ang responsibilidad ng isang tagapagligtas kung ang kahulugan nito ay malalagay niya sa panganib ang buhay niya?
Matutunan niya kaya na gamitin sa wasto ang kapangyarihan na ipapasa sa kanya ni Chairman Tai? Kasama rin nina Richard at Enchong sa kanilang Wansapanataym special sina Rio Locsin, Marina Benipayo, Sofia Andres, Atoy Co, David Chua, Mutya Orquia at Clarence Delgado.
Ito ay sa ilalim ng panulat ni Mariami Tanangco Domingo, at sa direksyon ni Erick Salud. Huwag palampasin ang pagpapatuloy ng pakikipaglaban nina Richard at Enchong sa kasamaan sa Wansapanataym Presents My Kung Fu Chinito ngayong Linggo na sa ABS-CBN.