JIRO MANIO
Mabuti naman at sinundo na ng kanyang kapatid si Jiro Manio sa Terminal 3 ng NAIA. Tatlong araw na nakita du’n ang magaling na batang aktor na palakad-lakad, walang direksiyong tinatahak, gusto raw niyang bumiyahe papunta sa isang malayong lugar kaya sa paliparan niya napiling magpaikut-ikot.
Gusto na rin daw magpunta sa Japan ni Jiro para makita ang kanyang ama, pero wala naman siyang visa at passport, kaya puwedeng sabihin na wala talaga siya sa tamang huwisyo nu’ng mga panahong ‘yun.
Iba-iba ang kanyang sagot sa mga tanong ng reporters na nagsadya sa kanya sa airport, mga sagot na tanging siya lang ang nakakaunawa, mga sagot na galing sa isang taong nasa ilalim ng kapangyarihan ng bisyo.
Mabuti at habang maaga ay nasundo agad si Jiro, iba pa rin ‘yung may kasama siyang mga kamag-anak na makasusubaybay sa kanya, gusto siyang ipa-rehab uli ng kanyang mga nagmamalasakit na kapamilya pero pera ang kanilang problema.
Minsan pa ay sa mga ganitong senaryo lulutang ang kagandahan ng puso ng mga pesonalidad, isa si Ai Ai delas Alas sa mga unang nag-alok ng kanyang suporta sa naging anak nito sa kanyang pelikula, handang tulungan ng Comedy Concert Queen si Jiro Manio tungo sa kanyang pagbabagong-buhay.
Maraming salamat sa mabuting puso ni Ai Ai delas Alas. At sana nga ay mauntog na agad sa katotohanan si Jiro Manio na walang nagagawang positibo sa buhay ng tao ang droga.