Blackwater ginulpi ng Rain or Shine, 123-85

NAGSAGAWA ng matinding ratsada ang Rain or Shine Elasto Painters sa ikalawang yugto bago tuluyang durugin ang Blackwater Elite, 123-85, sa kanilang 2015 PBA Governors’ Cup elimination round game kahapon sa SM Mall of Asia Arena sa Pasay City.

Mula sa 30-22 iskor sa unang yugto, gumawa ang Elasto Painters ng 31 puntos sa ikalawang yugto habang nilimita nila ang Elite sa 13 puntos para kunin ang 26 puntos na bentahe sa halftime, 61-35.

Hindi naman nagawang pigilan ng Blackwater ang opensiba ng Rain or Shine sa pagpasok ng second half dahil pinalawig pa ng Elasto Painters ang kanilang kalamangan sa 31 puntos sa pagtatapos ng ikatlong yugto, 87-56, bago pinalobo ito sa 38 puntos sa pagtatapos ng laro.

Pinangunahan nina Wendell McKines at Jervy Cruz ang balanseng opensa ng Rain or Shine sa kinamadang tig-15 puntos. Nag-ambag naman sina Paul Lee, Jeff Chan, Ty Tang at Beau Belga ng 13, 12, 11 at 10 puntos para sa Elasto Painters na umangat sa 2-4 karta.

Si Marcus Douthit ay gumawa ng 14 puntos para pamunuan ang Blackwater na nalaglag sa 1-6 karta.