NABIGO uli si Milan Melindo na makatikim ng titulo sa nilasap na sixth-round technical decision pagkatalo kay International Boxing Federation (IBF) light flyweight champion Javier Mendoza kahapon sa Ensenada, Mexico.
Dalawang hurado ang nagbigay ng 60-52 panalo habang ang isa ay mayroong 59-53 iskor pabor kay Mendoza para mapanatiling suot ang titulong idinepensa sa unang pagkakataon.
Natigil ang laban sa 2:39 ng ikaanim na round dahil sa malaking putok sa kaliwang kilay dala ng accidental headbutt.
Kontrolado ng Mexican champion ang laban habang si Melindo ay ilang beses na natawagan ng low blow.
Sa ikalimang round ay binawasan ng puntos ang Filipino challenger dahil sa low blow at sa ikaanim na round ay nagkauntugan uli sila.
May 24-2-1 (19 knockouts) si Mendoza habang si Melindo ay natalo sa ikalawang pagkakataon sa 34 laban.
Ang unang kabiguan ni Melindo ay nangyari sa kamay ni Juan Francisco Estrada ng Mexico para sa World Boxing Organization (WBO) at World Boxing Association (WBA) flyweight title noong Hulyo 2013 sa Macau.