PINAKAKASUHAN na ng plunder ng Senate blue ribbon subcommittee si Vice President Jejomar Binay, anak na si Makati City Mayor Jojomar Erwin “JunJun” Binay at 18 iba pa kaugnay ng alegasyon ng korupyon at anomalya sa Makati City.
Sinabi ni United Nationalist Alliance (UNA) spokesman JV Bautista na hindi na nabigla ang kampo ni Binay sa draft report ng subcommittee.
“It (draft report) has no purpose at all,” sabi ni Bautista bago magsimula ang pagdinig ng Senate subcommittee.
Iginiit naman ni Bautista na nananatili pa ring nangunguna si Binay sa mga posibleng tumakbo sa 2016 presidential elections sa kabila ng mga alegasyon laban sa kanya.
Ayon pa kay Bautista, hindi nagtagumpay ang mga senador na nag-iimbestiga kay Binay sa kanilang layuning pulitikal.
Idinagdag pa ni Bautista na wala nang direksyon ang ginagawang imbestigasyon ng Senado. Inquirer.net