Cagayan
Labing-isang estudyante ang sugatan nang tumagilid ang sinakyan nilang dump truck sa Sta. Teresita, Cagayan, ayon sa pulisya kahapon.
Ang 11 sugatan ay pawang mga estudyante ng Cagayan State University (CSU) Gonzaga Campus, na kasalukuyang sumasailalim sa “summer job” sa lokal na pamahalaan ng Sta. Teresita, sabi ni Senior Inspector Gary Matagay, hepe ng Sta. Teresita Police.
Naganap ang insidente dakong alas-9 ng umaga Lunes, habang minamaneho ni Rodolfo Baldeviso ang dump truck sa bahagi ng National Highway na sakop ng Brgy. Masi.
Sakay ng trak ang 46 estudyante ng CSU na patungo sa Sitio Palagao, Brgy. Simpatuyo, para lumahok sa “tree planting activity” na bahagi ng kanilang summer job, ani Matagay.
Sumalpok ang trak sa sementong road safety barricade at tumagilid sa katabing palayan, aniya.
“Fortunately, out of the 46 students, 11 lang ang nagkaroon ng injuries. Minor injuries lang, at nadala naman agad sa District Hospital sa Gonzaga… Wala namang seriously injured, although may dalawa na ni-recommend na magpapa-CT scan,” ani Matagay.
Sinabi ni Baldeviso sa pulisya na nagloko ang makina ng trak kaya siya nawalan ng kontrol sa manibela.
Pansamantalang dinitine si Baldeviso pero pinawalan din matapos mangako ang lokal na pamahalaan ng Sta. Teresita na tutulong sa pagpapagamot ng mga sugatan.