Jackpot sa Grand Lotto 6/55 aabot na sa P148M

Inaasahang aabot sa P148 milyon ang jackpot prize ng Grand Lotto 6/55 sa bola bukas ng gabi.
Ayon sa Philippine Charity Sweepstakes Office walang nanalo sa P140.6 milyong jackpot prize sa bola noong Miyerkules ng gabi kung saan lumabas ang mga numerong 39-21-12-42-49-48.
Umabot sa P37.4 milyon ang halaga ng itinaya sa naturang bola.
Nanalo naman ng tig-P93,720 ang 20 mananaya na nakakuha ng limang numero. Tig-P1,890 naman ang 791 mananaya na nakakuha ng apat na numero at balik-taya (P20) ang 17,295 mananaya na nakatatlong numero.
Nagkakahalaga ng P20 ang taya sa bawat anim na numerong kumbinasyon. Ang Grand Lotto ay binobola tuwing Lunes, Miyerkules at Sabado.