Kris may matinding kasalanan kay Vice

Habang maaga pa, habang puwede pa nilang ayusin ang kanilang hidwaan, ay dapat nang tutukan nina Kris Aquino at Vice Ganda ang kanilang problema.

Kahit hindi sila nagsasalita ay patuloy ang pag-ikot ng kuwento na may hindi sila pinagkakaintindihan ngayon, sangkot sa usapin ang diumano’y ideya ni Vice na “ninakaw” ni Kris Aquino, sa bawat pagsasalita ngayon ng pamosong komedyante ay ipinalalagay ng mas nakararami na ang aktres-TV host ang kanyang pinatututsadahan.

Nagsalita lang tungkol sa interpretasyon ng pagkakaibigan si Vice Ganda, ginamit lang nito ang salitang traydor ay si Kris na agad ang naisip ng mga nakarinig, kaya kailangan na nilang bantayan ang kanilang mga emosyon ngayon.

Si Kris ang nalalagay sa alanganin sa paghusga ng mas nakararami, lumalabas daw na tama si Ai Ai delas Alas sa pagkawasak ng kanilang pagkakaibigan ni Kris, kahit pa nagkabati na sila ilang buwan ang nakararaan.

Hindi raw marunong mag-alaga ng pagkakaibigan si Kris, sinsero ang ipinakikita at ipinararamdam sa kanya, pero kapos na kapos sa pagpapahalaga ang aktres-TV host.

Maraming taon na ang tinatakbo ng samahan nina Kris at Vice Ganda, maraming pagsubok na silang nalampasan, nakapanghihinayang naman kung mauuwi lang ‘yun sa wala.

Pero kapansin-pansin na walang gaanong kaibigan si Kris Aquino, bilang na bilang lang, kaya huwag na sana niyang pabayaang mawasak pa ang pagkakaibigan nila ni Vice Ganda.