ANG sagupaan ng mga welterweight champion ng mundo na sina Manny Pacquiao at Floyd Mayweather Jr. ay tinaguriang pinakamalaking boxing match sa kasaysayan ng boxing.
At bukod sa record-breaking ang kikitain ng dalawang boxers na ito ay magiging record-breaking din ang kikitain ng mga promoters ng laban.
Sinabi ng promoter ni Pacquiao na si Bob Arum ng Top Rank sa isang panayam sa ESPN, tatabo ang fight card ng mahigit $400 milyon kabilang na ang $74 milyon mula sa ticket sales.
Ang naturang WBO, WBC at WBA unification fight ay itinakda sa MGM Grand sa Las Vegas, Nevada sa Mayo 3 (Philippine time).
Ang unang target ng mga promoter ay makakuha lamang ng $40 milyon mula sa ticket sales ngunit dahil sa naging mataas ang interes ng mga boxing fans na mapanood ang laban ay tinaasan ang presyo ng mga ticket.
“Promoters first aimed for $40 million, then boosted the ticket prices from $1,000 to $1,500 at the low end and $5,000 to $7,500 for the best seats due to huge demand for the ducats,” sabi ni Arum.
Hindi pa umano nakontento, prinesyuhan pa ng mga organizers ng $10,000 ang ringside tickets kaya mula sa $50 milyon ay inaasahang aabot sa $74 million ang gate sales.
“It’s crazy, but it is what it is,” dagdag pa ni Arum. “It’s amazing.”
Bukod pa ito sa kikitain ng laban sa pay-per-view kaya malamang na aabot sa $400 milyon ang kikitain ng laban.
Ang record sa pay-per-view sales sa boxing ay 2.4 million buys noong 2007 nang biguin ni Mayweather si Oscar De La Hoya.
Para sa Pacquiao-Mayweather fight, naniniwala si Arum na papalo ito ng 3 milyon buys. Sa presyong $100 per buy ay garantisadong kikita ng $300 milyon ang laban sa US, Puerto Rico at Canada. Bukod na ito sa kikitain sa iba pang bansa.
“We wouldn’t have gotten a fraction of these numbers if we made the fight five years ago,” sabi ni Arum. “It turned out that we’re doing the fight at the right time, I guess, not that we’re geniuses for waiting this long.”
Matagal nang inaabangan ng mga boxing fans na magkasagupa sina Pacquiao at Mayweather at matapos ang ilang girian, matutuloy na ito sa Mayo 3.
“Between the gate, the foreign television sales and the closed circuit, which we can’t even calculate yet, you’re looking at over $120 million. And that’s before one pay-per-view has been sold in the US,” sabi pa ni Arum sa ESPN.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.