LOLA
“Gusto ko pa pong mabuhay. Gusto ko pa po makita na lumaki ang mga apo ko.”
Ito ang naiiyak na pahayag ni Anita Cajucom, 59, ng Bisig ng Nayon, Sangandaan, Caloocan City.
Ayon kay Anita, sa halip na mamalimos, pinili niya na magtinda ng rosaryo sa tren ng Light Rail Transit Line 1 mula Monumento hanggang Baclaran station para may maipambili ng gamot at pagkain.
Ayaw rin ni Anita na maging pabigat sa apat na anak dahil may kani-kanilang pamilya na ang mga ito.
Kwento ni Anita, nagkaroon siya ng bone tumor sa gilagid matapos itong pisain ng mister sa gitna ng kanilang pag-aaway.
“Nag-away kami noon kasi nambabae siya. Ang sabi niya, maingay daw ako kaya hinawakan niya ang baba ko,” pahayag ni Anita.
Sinabi pa ni Anita na may pumutok na ugat sa kanyang gilagid at may namuong dugo. Dahil sa kawalan ng pera, hindi niya agad na napatingnan sa doktor. Nagtungo lamang siya sa doktor matapos lumaki ang kanyang baba.
Matapos ang ilang pagsusuri, nakita na basag ang kanyang gilagid at doon na umano siya nagkaroon ng bone tumor. Natanggal na rin aniya ang kanyang mga ngipin.
Bukod dito, tinamaan din ng diabetes si Anita.
“Ang sabi po ng doktor, kung mayroong bone donor, papalitan ng buto ang gilagid ko pero kung wala, plastic bone daw. Napakamahal po, sabi ng doktor, mga P100,000,” pahayag ni Anita.
Dahil sa dumudugo na ang bukol ni Anita, nagpasya siyang magtinda ng rosaryo para may maipambili ng gamot at pagkain.
Sa kada rosaryo na naibi-benta, P5 ang napupunta kay Anita. Mismong ang anak ni Anita ang gumagawa ng rosaryo. Nabasbasan na rin aniya ng pari ang mga rosaryo na kanyang ibinibenta.
Umaabot sa P200 hanggang P300 ang kita ni Anita kada araw. Pero anya, kulang pa ito na pambili ng kanyang gamot.
“Minsan tatlong gamot lang ang nabibili ko. Kulang pero pwede na kaysa sa wala akong naiinom na gamot,” dagdag ni Anita.
Sumasakay si Anita sa LRT Line 1 sa Monumento station ng alas 9:00 ng umaga at umuuwi ng alas 3:00 ng hapon.