Mga Laro Ngayon
(JCSGO Gym)
1 p.m. Jumbo Plastic vs Tanduay Light
3 p.m. Cebuana Lhuillier vs Café France
KAKALISKISAN ang nagpalakas na Cebuana Lhuillier sa pagpapatuloy ng 2015 PBA D-League Foundation Cup ngayon sa JCSGO Gym sa Cubao, Quezon City.
Itinuturo ang Gems, na hanggang semifinals lamang ang inabot sa first conference, bilang team to beat matapos masilo ang 6-foot-7 Fil-Tongan Moala Tautuaa para pagtibayin ang kanilang puwersa.
Si Tautuaa ang top pick sa Rookie Draft ng Cagayan pero lumipat ng koponan sa offseason.
“Malaki ang maitutulong niya sa team dahil kailangan namin ng kagaya niya na malaki at kayang umiskor,” wika ni Gems coach David Zamar.
Kalaro ng Gems ang Café France sa ikalawang laro dakong alas-3 ng hapon at huhugot ang Bakers ng lakas sa makasaysayang kampanya sa nakalipas na conference na kung saan umabot sila sa semifinals sa unang pagkakataon.
Ang unang maglalaro ay ang Jumbo Plastic at Tanduay Light sa ganap na ala-1 ng hapon at ipakikita ng una ang apat na mahuhusay na manlalaro na idinagdag sa koponan habang ang mas magandang samahan ang sasandalan ng huli.