PUBLIC apology ang hiling ng isang nanay kay Piolo Pascual nang magtaray ang aktor sa social media at nandamay umano ng isang batang babae.
Ayon sa ina, nalagay sa alanganin ang reputasyon at imahe ng bata matapos i-post ni Piolo ang larawan ng anak kasama ang isang kaanak na una nang nag-bash sa aktor at tumawag sa kanya na “bakla.”
Matatandaan na di napigilan ni Piolo ang pagpatol sa isang Instagram user matapos sabihan siyang “bakla”.
Sinabi ng aktor may nakuha siyang impormasyon tungkol sa pagkatao ng basher kasabay nang pagpo-post nito ng isang photo collage kung saan makikita ang iba’t ibang litrato ng kanyang basher na si @joydagz7252009 – na may kasama pang batang babae.
Nilagyan ito ni Piolo ng caption na: “I hope your daughter (if she is) grows up to be a respectful person.” Pero agad din binura ito ng aktor.
Napag-alaman na hindi rin anak ng basher ang bata kundi kaanak lang, kung kayat lalong nag-init ang ulo ng ina ng bagets kaya humihingi ito ng public apology sa aktor.