AI AI DELAS ALAS AT GERALD SIBAYAN
TECHNICAL problem ang ibinigay na dahilan ni Comedy Queen Ai Ai delas Alas sa pagkawala ni Richard Yap as guest sa nalalapit niyang concert sa sosyal na The Theater ng Solaire Hotel & Casino titled “I Heart Papa” on Feb.12.
“Huwag na nating palawigin ‘yung technical problem. Basta ganoon na lang. Doon na lang tayo sa technical problem,” paliwanag ni Ai Ai noong makausap namin sa pictorial niya for a glossy magazine.
Mabuti na lang at mabilis din nakakuha agad ng pamalit kay Richard sina Ai Ai at co-producers niya sa concert. And they are none other than the two hunk actors Aljur Abrenica and JC de Vera.
“Oo, okey sila. Mas bata, mas OK. Syempre, ‘pag papa ang sinabi, dapat papable talaga ang ipapalit kay Papa Chen (Richard).
‘Yung kategorya naman ng papa ay pasok naman kay Aljur at kay JC,” ani Ms. A.
Halos kasing-edad lang nina Aljur at JC ang real-life boyfriend niya ngayon na si Gerald Sibayan, “Diyos ko, huwag na natin ‘yung i-ano, banggitin, ‘yung ka-love-aban. He-hehehe!”
Biniro namin si Ai Ai na baka magselos ang real-life boyfriend niya na halos kasing-edad din nina Aljur at JC, “Selos agad? Show lang ‘to. Hindi naman ‘to pang-matagalan,” ngiti niya.
Hindi maiaalis na pagselosan ni Gerald si Aljur dahil one time natsismis din ang Comedy Queen sa hunk actor, “Parang hindi naman, pa-sweeet,” kasunod ang tawa niya.“Wala na ‘yun. Noon pa ‘yun. Huwag na nating ungkatin. Mga anu-ano lang ‘yun, kunya-kunyari lang ‘yun.”
Sa kawalan lang daw ng isasagot sa tuwing tinatanong siya kung sino ang crush niya, “Sagot ko, ‘Wala rito, taga-kabila.’ Tapos, e, syempre nag-iimbento ako. Sabi ko, ‘Basta, letter A.’ Sumakto naman kay Aljur! Ha-hahaha!”
May nakakatawa pang kwento si Ai Ai tungkol kay Aljur.
“E, ‘di ano ako, arte-arte ako na, ‘Basta letter A.’ Eto na ngayon, ay, baka si Aljur ‘yan. E, ‘di ako nakiki-Aljur din ako. ‘Aljur! Aljur,’ ganyan. Hanggang sa, eto na, sabi nu’ng driver ko, ‘Ma’m, si Aljur! Nakita ninyo?’”
Sagot naman ni Ai Ai sa driver niya, “Sino ba si Aljur? Ano ba ang hitsura ni Aljur?”
Ang ginawa raw ng driver niya dinala siya sa EDSA at itunuro ang billboard ng aktor.
Tahasan na niyang sinabi na hindi mai-in love si Aljur sa kanya kapag magkasama na silang magpe-perform sa The Theater,
“Huh?! Bakit naman dumating na tayo sa ganoong eksena? Tawag nga niya sa akin Mama Ai, e.”
Sure siya na mako-compose naman niya ang kanyang sarili dahil nagawa na niya before nu’ng una silang magkita ni Aljur, “Behaved, syempre. May boyfriend na ako, e. (But) Wait lang, manood muna kayo (ng concert). Basta may magaganap,” habol niya.
Notorious si Ai Ai sa pagiging pilya on stage lalo na sa male guests niya. Alam kaya ‘to ni Aljur? Basta si Ai Ai, handang-handa na raw siya sa paghaharap nila ni Aljur on stage.
And of course, ‘di rin dapat kalimutan ang isa pang “papa” ni Ai Ai sa concert, ito ngang si JC. Last time nainterbyu namin ang aktor sa cast party after ng premiere night ng “Halik Sa Hangin,” sinabi niya na malabo if he can go out on date sa Valentine’s day dahil may trabaho siya.
Araw-araw daw kasi na meron siyang taping for his new soap. Mabuti na lang at nalibre siya on Feb.12.
Kwento pa ni Ai Ai, siya raw mismo ang pumili kina Aljur at JC bilang kapalit ni Richard. At bukod sa dalawang hunk actors, may isa pa siyang surprise guest sa show.
“Sige, singer (siya). Basta hanggang doon na lang,” diin niya.
Magbabago rin daw ulit sila ng layout for the poster since hindi magkasya ‘yung iba pang sponsors sa concert niya. Antaray, ‘di ba?!